بدأت من مطبخ بيتي، عشان أسرتي.

اسمي هند محمد ثابت، بكالوريوس تربية فنية، ٣٥ سنة حاليًا (سنة ٢٠١٨).

أنا زوجة وأم لأربعة أبناء. كان عندي حلم إني أعيش حياة ناجحة مافيهاش مشاكل وأقدر أربي أولادي كويس ويكونوا ذرية صالحة، ولكن أولادي كانوا بيتعبوا كتير وكنت لازم أروح للدكتور كل أسبوع بحد فيهم وساعات بيهم كلهم. وبدأت أنا كمان أتعب كل شوية على فترات، وبدأ يجيلي أمراض غريبة ومش متناسبة مع سني:

التهاب أعصاب وخشونة مفاصل ونقص حاد في الكالسيوم، مع هبوط فجائي في الضغط وصداع نصفي رهيب يوميًا تقريبًا.

آخرهم جالي التهاب شديد في الغدة الدرقية وسكري بيوطي بيبقى ٣٠ ويجيلي إغماء حتى لو أنا سايقة، ودي كانت مصيبة. والدكاترة الكبار أجمعوا إني هعيش بالدوا طول حياتي لإن الغدة مالهاش علاج، وشوية الغدة تبقى نشطة جدًا جدًا وشوية تبقى كسلانة جدًا جدًا، وباخد أقراص كتير يوميًا من الدوا بتاعها وطبعًا مينفعش أوقفه. كمان ظهرلي أورام بس الحمد لله حميدة، والدكتور قالي خدي بالك من أكلك لإن عندي تاريخ مرضي بالسرطان، والأورام دي فيه احتمال إنها تبقى خبيثة.

عدّى عليا شهور كنت في السرير مبتحركش، لازم حد يسندني، وعايشة بس عالحقن والأدوية: شنطتين مليانين.

حسيت إن حياتي مليانة دكاترة وأدوية وتعبانة على طول، مش عارفة أعمل حاجة، مابقدرش أشيل صينية غير لما تقع، ومش عارفة أراعي أولادي ولا بيتي ولا زوجي اللي شايلني. دي كانت بجد أصعب فترة عدّت عليا في حياتي كلها. اتحسنت شوية ونسبة الغدة اتظبطت شوية وبقيت بتحرك.

نزلت جيم، وبالصدفة شفت فيديو بتاع دكتور ريموند فرانسيس وإزاي بقى في سنه بدون أمراض فقط بمنعه للسكر والحاجات المضرة.

حسيت إن الأمل لسة موجود.

بدأت أمشي على نفس الخطوات: وقفت أكل الحاجات اللي ممكن تضرني، وأخدت كورسات تغذية وعرفت أكتر عنها، وجربت وفشلت لحد ما نجحت. وحبي للطبخ خلّى موضوع إني أستخدم البدائل أسهل بكتير، مع كمان إني واخدة كورسات طبخ.

أنا وقفت الأكل المضر كله في يوم وليلة. مشيت عالنظام ده شهور، وزوجي وأولادي انضموا ليا، والحمد لله بعدها حياتي مشيت للأحسن.

دلوقتي أنا مش مريضة الحمد لله، مباخدش أدوية لأي حاجة ولا حتى أسبرين، وأولادي مبيروحوش للدكتور كل شوية. نعمة وفضل من عند ربنا.

زوجي خس ووصل للجسم اللي كان نفسه فيه. طاقة جسمي عالية وبصحى نشيطة جدًا، وبعرف أراعي بيتي وعيالي. ماعنديش أورام، كلها راحت معرفش إزاي، وماعنديش غدة، وبعمل تحاليلي كل ٦ شهور بانتظام بقالي أكتر من سنتين، الحمد لله.

موقفة سكر ودقيق أبيض وأسمر وكامل، ومشتقات القمح والذرة والرز الأبيض، وكل ما هو معدّل وراثيًا. وبدلت كل ده بخضار وفاكهة أورجانيك، وبدائل صحية للدقيق زي جوز الهند والشوفان، وبدائل للسكر زي العسل الأبيض والتمر، وفيه بدائل تانية كتير.

نفسي وبحلم إن كل الناس تعرف إن الأكل هو السبب الرئيسي في إننا نتعب ونمرض أو نعيش بصحة كويسة.

نفسي الناس تعرف إن الأكل اللي بيتعمل في البيت أفيد وأطعم، وممكن يتعمل في وقت قليل، وممكن يتعمل بأقل التكاليف، وممكن يعيشوا حياتهم مبسوطين بدون أمراض.

حياتنا حلوة، بس إحنا اللي بنبص إزاي نخليها وحشة.